اولكن بيحبني... او.ما بيحبني!!

[talia]

هاي ,انا اليوم رح اعرض عليكن مشكله وبتمنا لاقي عندكن الحل لان انا هيدي المشكله بتخص اغلئ صديقه عندي وصديقتي طلبت مشورتي ولان انا ما عندي خبره بهالموضوع فضلت اني اعرض المشكله عليكن وانتو تلاقوا الحل...المشكله هي انو رفيقتي بتحب شخص ما بحياتا حكيت معو ولا نص كلمه مع انن بيشوفوا بعض كل يوم بحكم وجودن بنفس الجامعه بس ولا يوم حكيوا سوا, هيدا الشخص اوقات كل شي بيعملوا وكل تصرفاتو بتدل انو بيحبا واوقات تانيه بيجرب يعمل كل شي بيحسسا انا ما بتعنيلو..بعرف انو موضوعي كتيرمختصر بس رح اطرح عليكن السوال يلي هي سالتني اياه _كيف بعرف ازا بحبني ام لاء؟؟؟؟؟؟!!!!!!!!

[7ass00n]

هلا اختي تاليا

هو قصتك مختصرة كتير .. وما تاركة مجال كبير لنحكم على طبيعة اللي عم يصير مع صديقتك ..
اول شي لازم تميز بين الحب والاعجاب ..
كلمة حب اكبر من مجرد حرفين .. مش ببساطة البنت او الشاب بيقدر يقول هالشخص اكيد بيحبني .. او اكيد ما بيحبني ..
المعاملة .. الكلام .. التصرف .. الاهتمام .. وعوامل كتيرة اخرى بتبين اذا هالشخص بيحب او لا ..
والاعتراف بالحب هو الاساس .. من دون اعتراف .. الحب بيضل اعجاب .. او عالاقل رح يكون من طرف واحد ..

اذا هالانسان ما اعترفلك بحبو الك .. ما فيكي تعيشي العمر كلو على وهم انو بيحبك ..
بالنسبة لصديقتك .. فيها تعمل عدة اختبارات لهالشاب كرمال تعرف اذا هي بتعنيلو اكتر من مجرد صديقة ..
وهالنوع من الاختبارات معروف اجمالا لدى الطرفين .. كتير من هالاختبارات روتينية صارت بس بتضل بتعطي اشارات معينة عن طبيعة المشاعر .. منها الوقوف مع شاب اخر وهو شايف .. ومنها ادعاء التعب والمرض .. وكتير من هالامور .. وانتو كصبايا المفروض اخبر بهالنوع من الاختبارات صح ؟

ما رح طول اكتر .. بس انو صديقتك ما تستعجل الامور .. والحب مش كلمة بالتم .. تتقرب من الشاب وتتعرف عليه اكتر .. وتاخد وقتها لتكتشف طبيعة مشاعرو ..

وعلى فكرة .. خليها تركز على درسها هلأ احسنلا ... لاحقة :n200692:

سللام

[talia]

مرسي كتير حسون علئ هالرد وانا معك بكل اللي قلتو...:more1(1):

[PaL-M]

مرحبا تاليا ..يعني بعتقد اخي حسون ما ترك شي الا وحكاه ..
لازم صديقتك تحط براسها الحب لازمو علشان يتم ويصير بالفعل حب الاعتراف والمصارحة اما لو ما صار هيك شي متل ما اتفضل اخي حسون راح يظل نوع من الاعجاب مش اكتر ..
والاعجاب تقريبا لتكون المرحلة اللي قبل الحب مباشرة يعني هالاعجاب لو ما نمناه وكبرناه بقلوبنا وعقولنا راح يظل على شو هو وما راح يقدر يتحول لحب
اما بقصة كيف تعرف بحبها او لأ فهادي متروكة للصبايا لانهم اخبرمنا بهيك اشيا .
بس بحب قولك هالاختبار ممكن يفيدكم انو مثلا هالبنت تحرج الشب لا تستغربي ايه تحرجو وقتها راح يبين بحبها او لأ -بس الاحراج يكون مش كبير كتير طبعا-
كل الاحترام والتقدير ..
موفقة انتي وصديقتك ...

[talia]

شكرا بال -م علئ رايك وعالفكره الجديده ,كلك زوق..

[Kiwi]

ممممم

ليكي راح رد بأختصار
أنا برأي أزا بحبا راح يجي لعندا ويقلها بحبك ...... ممكن يكون اعجاب مو حب بتفرق

قلينا اخر التطورات ماتنسي ...:n20065:

[سوسو]

ولو يا تاليا ليش وين راح احساس المراة
هي الوحيدة الي بتقدر تحس وتكتشف محبتها بقلبها قبل اي حدا تاني
ولو ما حكى معها نص كلمة
ولوووووووو
مع احترامي لاراء اخوتي الللي قبلي بس ما قريت مشاركاتهم كتبتلك راي بسرعة

[قمر لبنان]

هـــلا بـ تاليا وبصديقة تاليا

بس بالفعل عيوني ما ذاكريتلنا ولا اي طرف من الاطراف لنعرف وين اول الخيط !!

سمالله ماشاء الله سبقتوني شباب ما خليتو شي ينحكى يعطيكون الف عافية يارب

بالنسبة الي رح ئللك عن طرق واما انو بيحبها او لآ ربك هوي اللي اعلم خليها تكتشف بنفسها اذا اتبعت طرقنا

تاليا في الف ومية طريقة تكتشف فيها مشاعرو .. ومنها الطرق اللي ذكرها خيي حسون

وكمان ما بتعرفي يمكن بالوقت اللي بيبينلا انو ما بتعني له بيكون عميتقصد انو يثير فيها مشاعر الغيرة عليه والاهتمام فيه انو حركات الشباب كلنا منعرفا :n200682:..

بئللك طريقة بس سكروا دينيكوا يا شباب اوكي:n200692:

ليكي تاليا صدقيني بحكيكي عن شغلة بديهية انو الوحدة لما تهتم بالشاب وبيصير يحس عليها انو في اعجاب من طرفها بيصير يتدلل ويتدلع يئبرني انا :qamar_22:

ولما بتكون قلبيا بتتمنى منو نظرة وبتطنشلو ولا بتعبروا ..ولا بتعتبروا انو موجود على وجه الكرة الارضية ساعتها بيثير فضوله وبيصير هوي اللي بيلاحقا وبيتمنى يحكي معا لو كلمة مممممم ,,,

وكمان صرنا بعصر صار في الف ومية طريقة لتقدر تحتك بالشخص المقصود وبهيك مرة عمرة بيحكو مع بعض وفيا تطلب مساعدتو بشي مادة هيك بيصير عندها الفرصة انو يطول الوقت وهني عميحكو مع بعض بما انون بنفس الجامعة,, وبهيك بقى في مجال ساعتها تعرف طبيعة مشاعرو بس لازم يكون عندها الجرآة الكافية لتقدر تحكي معو بالاول ..

بعرف ولو انه رح يكون حكي عادي وعملي بيناتون بباديء الامر بس شكلا انو في اعجاب من ناحيتها لهيك انا مأكدة انو قلبا رح يوقع بالارض بس مجرد ما تقللو مرحبا الله يعينها :n200682:

تتكل على الله وتتجرأ أو تتبع طريقة التطنيش أو تحكي معو عالقليلة تقلو صباح الخير او باي ومن هالكلمتين بتجي كيفك وكيفو قلبك !!:n200692:

خلي يكون عندها ثقة بنفسا قوية بتعزز قدراتها وجرآتها على تكملة الموضوع بطريق صحيح



واخيرا ما تنسي تخبرينا شو صار معها اوكي نحن بإنتظار النتائج
الك مني قبلاتي وتحياتي

اختك قمر

[talia]

عنجد انا كتتتتتتتتتتتتتتتتتير بشكركن علئ هالردود وعلئ ارائكم المهمه:more1(1): والمهضومه بنفس الوقت:n20065:,وبوعدكن اول ما يصير تطورات بهالقصه رح بلغكن فورا...:n200682:

[iRuMi]

sri shabab bs ma kara2et rdoodkom bs ana b2dor 2olek taree2a momken tenf3 o momken l2 :P 5aleeha tseer tetfada o tbatel tbayen so bs yef2edha ra7 akeed yes2al 3anha wa7ad men ref2atha fa heek heyi ra7 t3raf eza mehtam feha wela l2 ^_^ lol

m3 eno ana law 3emlat hayk ma bs2al xD ana bs 2o3jab b wa7di ma b3mal aya 7araki eza heyi tanashatni bs momken at7arkash feeha asare7ha eza heyi t7arkashat feyi b 2aya taree2a :P haha

inshala koon fedtek xD

[طائر الفينيق]

انا بقول انو ما بعرف يعني بدي اقعد حلل وما عرفان كيف

لك يا جماعة نضحك على بعض كل القصة شوية نظرات بالاول منها وبعدين بس تحس انو عم يتطلع فيها تاني نهار تتخبا عليه وتشوفوا من بعيد بتعرف اذا عم بيدور عليها ولا لا ء

وعلى هالاساس بتستوي الطبخة اسرع

خبرينا شو بيصير اوكي تاليا

[سفير المنتدى]

الحب ضياع
فلو فكرت قليلا لما ذهبت اتجاه الحب
عزيزتي الحب امر جدا صعب وخصوصا في حياتنا الحاليه
أنا افضل ان تكمل دراستها أفضل لها من الحب حاليا في حال انها لم تعلم بعد في اتجاهه لها

العلم فوق كل شيء وخصوصا انها انثى ولا يرفعها الا علمها
فالرجل لا يهمه شيء
يجب ان تفكر في المستقبل وما يخبئ لها من ايام سوداء وبيضاء

عموما كما قلت الدراسه افضل من الحب


يضرب الحب شو بخلينا ننسى كل حياتنا:n200682: ههههه
منبطل نشوف شي تاني:n200669:

تحياتي عزيزتي

[سفير المنتدى]

انا بقول انو ما بعرف يعني بدي اقعد حلل وما عرفان كيف

لك يا جماعة نضحك على بعض كل القصة شوية نظرات بالاول منها وبعدين بس تحس انو عم يتطلع فيها تاني نهار تتخبا عليه وتشوفوا من بعيد بتعرف اذا عم بيدور عليها ولا لا ء

وعلى هالاساس بتستوي الطبخة اسرع

خبرينا شو بيصير اوكي تاليا

احلى طائر الفينيق
عنجد اختصار حلو وعجبني بس بدها شوية جرأه
تحياتي يا حلو

[ساندي]

انا كنت مو حرد عليكي مو تكبر لا والله ولكن لاني القيت كتار ردوا عليكي وعندهم خبرة اكتر مني لهلسبب حبيت رد بشي بسيط بتمنى رفيقتك تعملو يمكن ينفع اوكي :n200692:
قولي لرفيقتك تشتري مسبحة << بتعرفي شو هي ؟؟؟؟ هيدي يللي بيسبحوا فيا الختيارية .. >> ويكون عدد حبات المسبحة شي 500 حبة او شي الف احسن
وتبتدي تاخد حبة وتقول : بيحبني
وتاني حبة مو بيحبني
وبيحبني
ومو بيحبني
وهيك ليخلص كل الحبوب ولما بتوصل لاخر حبة تشوف شو هي يعني بيحبها واللا ما بيحبها اوكي فاذا كان بيحبها تروح وتعمل متل ما قال المدير العام واللا تروح وتنام للصبح وتاني يوم تروح الجامعة ولا تلتفت عليه منوب منوب :sm244:
ويللا باي:n200669:

[تحرير]

ليكي تالية لو هو بحبها بيجي بحكي هو معها وبصارحها بكل مشاعره بدل ما انها تنتطر على الفاضي وهي بتقدر تعرف من تصرفاته اذا كان بحبها اولا واذا ما كان في فايدة ليه تستنى علفاضي او ترسم امل على الفاضي وزي ما حكى اخونا حسون في فرق بين الاعجاب والحب ويمكن يكون مجرد عادة اتعود عليها كل يوم مش اكتر

[شاعرة لبنان]

انا برئيى التطنيش احسن طريقه لانها مجربه ههههههه بس بعتقد اراء الشباب كمان منيحه وازا فيكى متل ماقالت قمر اوقات اليلو هاى وباى واوقات طنشى وشو فى ساعتها كيف بيوقع وبيصير عندو فضول يحكى معك اكتر ويتعرف عليكى....................تقبلى مرورى